Орон нутгийн болон бүс нутгийн засаг захиргаад ба ИКЛЭЙ
ИКЛЭЙ — Тогтвортой хөгжлийн төлөөх нутгийн захиргаадын олон улсын байгууллага нь хот, суурин газрын тогтвортой хөгжлийг хангахад чиглэсэн үйл ажиллагаа явуулдаг бөгөөд дэлхийн 1750 гаруй орон нутгийн болон бүс нутгийн засаг захиргааг нэгтгэсэн томоохон сүлжээ байгууллага юм. Бид 100+ улсад идэвхтэй үйл ажиллагаа явуулж, тогтвортой хөгжлийн бодлогод нөлөө үзүүлэн, хорт утаагүй, байгальд түшиглэсэн, тэгш хүртээмжтэй, тэсвэртэй, тойрог хөгжлийг цогцлооход орон нутгийн үйл ажиллагааг дэмжин чиглүүлдэг.
ИКЛЭЙ байгууллага нь тогтвортой хөгжлийг хот суурин газрын хөгжлийн салшгүй хэсэг болгож, практик, цогц шийдлүүдээр дамжуулан хот суурин газарт системтэй өөрчлөлт хийх боломжийг бий болгодог. Бид хот, тосгон, бүс нутгуудад явагдаж буй хурдацтай хотжилт, уур амьсгалын өөрчлөлт, экосистемийн доройтол, тэгш бус байдал зэрэг асуудлуудыг урьдчилан таамаглаж, хариу арга хэмжээ авахад туслалцаа үзүүлдэг.
Манай сүлжээнд нэгдсэн хот, суурин газар, орон нутгийн болон бүс нутгийн засаг захиргаад өдөр тутмын үйл ажиллагаа, бодлогодоо тогтвортой хөгжлийг тусган, хэрэгжүүлэх маягаар дээрх асуудлуудыг даван туулж байна. Бид өгөгдөл, шинжлэх ухааны нотолгоо, орон нутгийн бодит байдалд тулгуурласан, төрөл бүрийн дарамт шахалтуудыг тооцон авч үзсэн шийдлүүдийг боловсруулж, шийдвэр гаргахад шаардлагатай чадавх, мэдлэгт хөрөнгө оруулалт хийдэг. Мөн өөрчлөлтийг системтэйгээр хийж явуулахад ашиглах зорилгоор хөгжлийн таван чиг баримжааг боловсруулан удирдамж болгон ашигладаг.
Бид тулгарч буй асуудал болон чадавхын түвшний хувьд зөрүүтэй, том жижиг олон янзын хот, суурин газар, бүс нутагт хүрч ажилладаг. Тэдгээрийн олонх нь өмнөө томоохон зорилт тавиад, түүндээ амжилттай хүрч чадсан бөгөөд тогтвортой хөгжлийн асуудлаар тэргүүн эгнээнд алхаж, шинэ шийдлүүдийг санаачлан, тогтсон хэв маягийг эвдэн ажиллаж байна. Бусад нь тогтвортой хөгжлийн зорилтуудад хүрэхийн тулд систем, чадавхаа бэхжүүлэн, шилжилтийн эхний алхмуудаа хийн ажиллаж байна.
Бидний тусламжтайгаар хамгийн сүүлийн үеийн дэлхийн түвшний мэдлэг, шийдлүүдийг орон нутгийн түвшинд нэвтрүүлэх бололцоотой болдог. Мөн хот, суурин газрын тогтвортой хөгжилд тогтолцооны өөрчлөлт хийх зорилгоор манай мэргэжилтнүүдийн баг гишүүн хотуудтай харилцан солилцоо хэрэгжүүлэх, түншлэл үүсгэх, чадавх бэхжүүлэх замаар хамтран ажилладаг.
ИКЛЭЙ нь орон нутаг, бүс нутаг, үндэсний болон дэлхийн засаг захиргааны байгууллагын түвшинд харилцаа холбоо үүсгэж, олон улсын байгууллага, үндэсний засгийн газар, судалгаа, санхүүгийн байгууллага, иргэний нийгэм, хувийн хэвшилтэй стратегийн холбоо үүсгэн хамтардаг. Бид олон салбарын мэргэжилтнүүдээс бүрдэх хамтарсан багууддаа инновацын шийдэл санаачлан, нэвтрүүлэх орчин нөхцөлийг бүрдүүлэн өгч, түншүүдтэйгээ хамтран хот, суурин газрын тогтвортой хөгжлийг дэмжих шинэлэг арга замуудыг бий болгох зорилтуудыг өмнөө тавин ажилладаг.
Тогтвортой хөгжлийг улс орон, дэлхий нийтийн хөгжлийн тулгуур хэмээн өргөн хүрээнд хүлээн зөвшөөрдөг болохоос өмнө ИКЛЭЙ-г анх үүсгэн байгуулсан орон нутаг, бүс нутгийн засаг захиргаадын бүлгийн зүгээс энэ чиглэлээр аль хэдийн зарим тодорхой арга хэмжээг авч эхэлсэн байсан. Бидний хүчин чармайлт энэ олон жилийн туршид тогтвортой хөгжлийг дэлхий даяарх орон нутаг, бүс нутгийн засаг захиргаадын үйл ажиллагааны хөтөлбөрийн тэргүүн эгнээнд тусгуулахад чиглэгдсээр ирсэн юм.
Цаг хугацааны явцад ИКЛЭЙ өргөжин тэлж, одоогоор 100 гаруй оронд суугаа 22 төлөөлөгчийн газраараа дамжуулан үйл ажиллагааг явуулж, хот, суурин газрыг тогтвортой хөгжүүлэх зорилго бүхий хамтын хүчин чармайлтын үр дүнд дэлхийн хөгжлийн замналыг өөрчлөхөд жинтэй хувь нэмэр оруулж байна.
